ఏయూ శతాబ్ది ఉత్సవాలు: ఆంధ్రా విశ్వవిద్యాలయం ఎలా ఏర్పడిందో చెప్పిన గవర్నర్ అబ్దుల్ నజీర్

ఆంధ్ర విశ్వవిద్యాలయం (ఏయూ) శతాబ్ది ఉత్సవాల చారిత్రక సందర్భంలో ఆంధ్రప్రదేశ్ గవర్నర్, వర్సిటీ ఛాన్సలర్ ఎస్. అబ్దుల్ నజీర్ ప్రసంగించారు. వందేళ్ల ప్రస్థానంలో వర్సిటీని ఉన్నత స్థాయికి చేర్చిన మహనీయుల కృషిని, దార్శనికుల సేవలను ఆయన సవివరంగా గుర్తుచేసుకున్నారు. ఈ సందర్భంగా ముగింపు వేడుకల్లో వర్సిటీ వీసీ, డీన్లు, అధ్యాపకులు, సిబ్బంది, విద్యార్థులు, పూర్వ విద్యార్థులకు ఆయన శుభాకాంక్షలు తెలిపారు.

1913లోనే తెలుగు ప్రాంతానికి ప్రత్యేక విశ్వవిద్యాలయం కావాలనే డిమాండ్ వచ్చిందని, దాని ఫలితంగా 1926 ఏప్రిల్‌లో ఆంధ్ర యూనివర్సిటీ చట్టం అమల్లోకి వచ్చిందని గవర్నర్ తెలిపారు. తొలుత విజయవాడలో ప్రారంభమైన ఈ విద్యాకేంద్రాన్ని, వ్యవస్థాపక ఉపకులపతి (వీసీ) సర్ సీఆర్ రెడ్డి విశేష కృషితో విశాఖపట్నానికి మార్చారని గుర్తుచేశారు. గొప్ప విద్యావేత్త, సాహిత్య విమర్శకుడైన సీఆర్ రెడ్డి వర్సిటీకి బలమైన పునాదులు వేశారని కొనియాడారు. ఆయన తర్వాత వీసీగా బాధ్యతలు స్వీకరించిన డాక్టర్ సర్వేపల్లి రాధాకృష్ణన్ సేవలను స్మరించుకుంటూ, "అనుభవాసాన మేవ విద్యా ఫలం" (అనుభవమే విద్యకు ఫలం) అనే ఆయన మాటలను ఉటంకించారు.

వర్సిటీ అభివృద్ధికి రాధాకృష్ణన్ అదనపు భూమిని సేకరించారని, బొబ్బిలి, పానగల్, పీఠాపురం రాజులు, విజయనగరం, ట్రావెన్‌కోర్ మహారాజుల ఉదారమైన విరాళాలతో భవనాలు, హాస్టళ్ల నిర్మాణం చేపట్టారని గవర్నర్ వివరించారు. నోబెల్ బహుమతి గ్రహీత రవీంద్రనాథ్ ఠాగూర్ 1933, 1934 సంవత్సరాల్లో వర్సిటీని సందర్శించారని గుర్తుచేశారు. డాక్టర్ వీఎస్ కృష్ణ వంటి ఎందరో వీసీలు వర్సిటీని ఉన్నత పథంలో నడిపించారని కొనియాడారు.

నోబెల్ బహుమతి గ్రహీత సర్ సీవీ రామన్, ప్రపంచ ప్రఖ్యాత గణాంక నిపుణుడు పద్మవిభూషణ్ ప్రొఫెసర్ సీఆర్ రావు ఈ విశ్వవిద్యాలయం పూర్వ విద్యార్థులు కావడం గర్వకారణమని అన్నారు. మాజీ ప్రధాని డాక్టర్ మన్మోహన్ సింగ్ ఈ వర్సిటీని "అద్భుతమైన విశ్వవిద్యాలయం"గా అభివర్ణించడాన్ని ప్రస్తావించారు. ఈ వందేళ్ల ప్రస్థానంలో వర్సిటీని తీర్చిదిద్దిన గొప్ప విద్యావేత్తలు, ప్రముఖులకు తన నివాళులు అర్పిస్తున్నట్లు గవర్నర్ తెలిపారు. "ఎందరో మహానుభావులు అందరికీ వందనములు" అంటూ తన ప్రసంగాన్ని ముగించారు.